Prins Glenn I is geine onbekènde in Baek en zeer zeker neet bènne de Baeker Pottentaote. Hae haet in ‘t verleeje, net ès ziene broor Mitch, ‘t kostuum moage drage van hofnar; de site-kick van de Jeugprins van de Baeker Pottentaote. Téves is Glenn lid van vastelaovesgroep “’t soppegreun”, waomit hae reeds väöle jaore de optochte kleur geuf.
Glenn haet ein passie veur architectuur en wirk ès ingenieur bie ingenieursburo Palte in Valkebèrg. Daonaeve is hae aardig sjportief aangelag. Vreuger fitste hae gaer en sjtông ès judoka op de mat. Momenteel is hae behèndig op ‘t handbalvèld en actief bie de hjère 1 van BFC. Gaer bung hae zich de latte ônger, om te gaon skieje, mèr dat d’r dit jaor neet van kômme. Mit de condisie zal ’t dus waal good zitte, om ’t lange vastelaovessèzoen good in te völle.
