Zondig 14 jannewarie verangerde ’t Pottentaote-riek in ware Nickelodeon-sfere. Dit waor te bekieke in het Asta-theater, wo SpongeBob ès thema veur de jeugzitting op ‘t prègram sjtông; ongermjèr SpongeBob SquarePants, Patrick Ster, Octo Tentakel waore van de partie, om op zeuk te gaon nao de nuuje jeugdprins van de Baeker Jeugpottentaote. Ein fantastisch decor zörgde auch dit jaor weer veur de gooje sfeer tiedens dees jeugzitting. ‘T ontbraok werkelijk aan niks, om ‘t fjès compleet te maake.
Op ‘t einde van de jeugzitting woort Pim Daemen, geinstalleerd pès jeugdprins Pim II van de Baeker Jeug Pottentaote. Pim II wurt ôngersjteund door hofnar Stef van Schendel.
Jeugprins Pim II is 11 jaor auwt en zit op basissjwoal OBS de Kring in groep 8. Hae sjleit gaer taege eine shuttle tiedens een partieke badminton en trap gaer taege ein bèlke mit zien vrunj op ’t trapvèldje in buurt ‘t Kirkevèld. Auch kiek hae gaer nao zien favoriete voetbalclub Ajax. Daonaeve is hae fan van sjnèlheidsduvel Max Verstappen. Pim is op dezèlfde daag jeurig, ès ziene veurgènger auwt jeugprins Mano I, allein is hae ein jaor jônger. Hae haet ’t vastelaovesblood door zien aojers sjtruime en haet ’t virus auch mit de paplaepel bènne gekrege. Ziene pap waor in ’t verleeje auch jeugprins, mèr dae haet bie de Sajelaire in Aelse de scepter maoge zjweije. Jaorliks löp Pim al van baby af aan mit in de optochte, mit ein van de weinige buurtvereiniginge die Baek nog riek is “Buurt ’t centrum”, mit ’t ganse gezin; pap Christian, mam Laura en zösterke Sanne. Pim is van nature altied lèkker röstig en kènt mèkkelik omgaon mit sjtrèss; soms haet hae gèt te völ energie, wodoor hae d’rop los wiebelt. Deese eigensjappe kômme häöm good vanpas de kômmende tied, want d’r kômme aardig gèt verassinge aan h’m veurbie.
Jeugprins Pim II zal d’r sjwoan opsjtaon tiedens ziene zaegetoch door de Baekse sjtraote op zondigaovend; ès de leechstoet ter èjre van häöm wurd georganiseerd. Dit wurd dus voor häöm zien jubiléumoptoch, ès hae hie veur de 11de kjèr aan deil deit numme.
‘T motto van Jeugprins Pim II is;
Vastelaovend vèng ich super top,
Dit jaor zèlfs mit de prinsesjteek op.
Sjprènge en danse doon ich neet allein,
Dees drie daag vier’ste mit eederein!
Wilt geer Jeugprins Pim I komme felicitére, dan kènt geer häöm de hand kômme sjudde op vriedig 9 fibrewarie in Café Benelux, vanaaf 19.00 oer. Hienao kènt geer auch mit häöm danse. Wilt geer allein danse mit jeugprins Pim II, dan zeet geer van harte wèlkom op `t kènjersjprènge op zondig 21 jannewarie in zaal ‘t Auwt Patronaat vanaaf 14.00 oer.