Tiedens ein zeer drök bezochte en sjprankelende groate zitting in het ASTA-theater aan de mèrt in Baek is afsjied genômme van Prins Glenn I (Nijsten). Het publiek woort getrakteerd op optraejens van ein keur aan artiesten; o.a. Marlon Kicken, Wir sind Spitze, Dobbel3, Erwin en natuurlik de welbekènde klanken van de Baeker Hofkapel.

‘T hwoagtepunt waor natuurlik de oetreuping en instalasie van de nuuje prins van ‘t Pottentaoteriek: de 25 jaorige Ivo Wintraecken.

Kômmend vastelaovessèzoen zal Ivo Wintraecken regére ès Prins Ivo I. Ivo haet een relasie mit Milou Hendriks en woont aan ‘t Roebroekpad 14 in Baek. Prins Ivo I is geine onbekènde in ‘t Baekse en zeer zeker neet bènne de Baeker Pottentaote. Hae haet in ‘t verleeje, deil oetgemaak van de jeugraod van de jeugprins van de Baeker Pottentaote. Teeves is Ivo reeds enkele jaore aktief ès begeleider van de groate optoch op vastelaovesmaandag, woo de prins ziene zaegetoch maak door de Baekse sjtraote. Auch veur angere hand en sjpandeenste is Ivo te porren; hulp bie de groate zitting èsauch begeleiding ès verkjaersreigelaer is häöm op ‘t lief gesjréve. Van 1999 t/m 2004 haet hae deilgenômme aan de jeugzitting, wèlke door kènjer veur de kènjer wurt gemaak.

Ivo haet passie veur ‘t lesgaeve aan jeug bie Sjwoalegemeinsjap Groenewald in Stein ès docent

Techniek en Natuurkunde. Ein angere passie van Ivo is mèziek; meermaals haet hae de podia besjtége mit de Steinse band Lamshade. Daonaeve is hae al menig jäörke ein van de gezichte van Kènjer Vèkansie Wèrk in ‘t Baekse; tiedens zien 19 jaorige carrière 5 jaor ès deilnummer; 4 jaor ès leiding; 10 jaor lid van de kèrngroep, wovan 3 jaor ès veurzitter. Auch is hae aktief ès evenemente-verkjaersreigelaer, dit verwis ôngermjèr nao zien prinselikke ôngersjeijing wèlke Ivo haet ontwôrpe, ’t welbekènde gaele hèsje. In 2013 maogde prins Ivo I de jeugvriewilligerspries in ôntvangs numme van de gemeinte Baek, dit ôngersjtreep, dat hae ein bezig bieke is op väöle vlakke bènne de Baekse gemeinsjap! Teeves is Ivo sinds 2016 drager van de Kitsch, wèlke eeder jaor op èsj-woonsdig wurt oetgereik. De Baeker Pottentaote höbbe mit häöm ein sjot in de roas.

De liefsjpreuk van Prins Ivo I:

“Vastelaovend maake v’r saame!”

Wilt geer Prins Ivo I kômme felicitére, dan kènt dat op zaoterdig 10 fibrewarie in ‘t ASTA-theater aan de mèrt in Baek vanaaf 20.30 oer. Wilt geer leever dansen mit ziene dorslustige hwoagheid, dan zeet geer van harte wèlkom op `t prinse galabal op zaoterdag 3 fibrewarie auch in ‘t Asta-theater vanaaf 20.30 uur.