Pottentaote/ pottentaotinnekes Allewiel!!!
Bèste vastelaovesvrunj,
Normaal gesjpraoke beginne veer op 11-11 aan ein nuut vastelaovessèzoen. ‘T road/ gael/ greun blood in ôs oajers zörg, dat ’t vastelaoveshèrtje sjnèller geit kloppe. Veer beginne dan aan ’t belangriekste van al de onbelangrieke dènger; ’t limburgscultureel èrfgood: “ôzze vastelaovend”. Helaas zin d’r toch belangrieker zaake, de volksgezondheid!
Wie veer de aafgeloupe vastelaovend deege aafsjléte bie de Pottentaot op vastelaovesdinsdig tiedens ’t vaansjtrieke, kôsjte veer neet bevroede, wie de vlag d’r noe in deese tied bie zauw hange.
Ein paar waeke later, de waek veur hauf-vaste, krége veer immers al de èsjte pèrsconferentie mit de mededeiling, dat väöl zaake, die veer normaal vônge, neet mjèr zwao normaal zauwe zin.
Horeca ging veur onbepaalde tied op sjloat; zwoa väöl meugelik thoes wirke; neet op bezeuk bie de zwoa geleefde luuj, die èch op ein bezeukske zaote te wachte in o.a. de diverse bejaarde-/ verpleegtehoeze; fjèskes môste waere oetgesjtèld; enz. enz.
De angerhauve maeter saamelaeving woort ès ’t nuuje normaal geïntroduceerd.
Natuurlik geiste dich ès vastlaovesvereiniging auch beraoje, wie ’t volgend vastelaovessèzoen gesjtalte zauw kènne kriege. Es allerèsjte naome veer ’t besjloet, om de zeuktoch nao eine nuuje prins oet te sjtèlle pès september, haupende dat ’t corona-virus dan ônger controle zauw zin.
In de zomer woorte de opgelagde reigels gèt versoepeld. Mèr veer zaoge toen al, dat veer mit de angerhauve maeter saamelaeving neet de vastelaovend zauwe kènne organisére/ viere/ invölle, wie veer ’t normaal gewènd zauwe zin. Helaas haet ôs de tied noe alweer sjnèl ingehaold; o.a. is de horeca inmiddels alweer gesjltoate. Haupelik maoge zie sjnèl weer oape.
Dit vastelaovessèzoen is ein jaor, dat in ’t geschiedenisbook wurt opgeteikend dat angèsj is ès angèsj. Gein prinse die noe zenuwèchtig zin, omdat zie in Baek de vastelaovend veur maoge gaon; gein veurbereiding op de diverse evenemènte; neet sjrieve aan ein verhaollien veur de jeugzitting/ boewe aan ein super decor of oefene mit de kènjer; de optochhal blif gesjlaote, wo normaal gesjpraoke geboet wurt aan die sjwoan vastelaoveswaages ônger gèt sjaele kal euver en weer; auch zulle veer gein sjponsore gaon benadere die ‘t in deese coronatied auch lèstig höbbe; enz. enz.
Toch wille veer aeve sjtilsjtaon bie de aanvang van dit vastelaovessèzoen. Veer zin vanmörge mit ein paar man bie pèstoar Kenis nao de mès gewaes, die de mèsintensie heij: “veur alle laevende en euverléje lede van de Baeker Pottentaote”. Auch höbbe veer 2 graafsjtökke laote zaegene en op beide begraafplaatse neer gelag, zwoa wie veer dat eeder jaor doon. Auch höbbe veer thoes de pottentaote-vlag aan de gevel gehange, om bliek te gaeve aan de sjtart van ein nuut sèzoen.
Veer kieke wat veer bènne de geboaje meugelikhéde kènne, mèr veer verwachte dit sèzoen helaas neet väöl invölling aan de vastelaovend te kènne en maoge gaeve.
Waal zin veer momenteel achter de sjèrme bezig mit de veurbereidinge, om bie “de Pottentaot” de geschiedenis van de baekse vastelaovend zichbaar te gaon maake.
Leef vastelaovesvunj,
blief veural gezond en zörg good veur de luuj om uch bie!
Allewiel!!!