Wat ein sjwoan jubiléumweekend höbbe veer achter de rögk. Vriedigaovend 3 febrewarie zin veer begösj mit ein informele recepsie veuraafgaond aan de fjèsaovend, dae veur gans Baek in petto heije. Op deese aovend heije veer ès geschènk nao de bezeukers ein jubileumsjpang vaerdig ligke. Eine aovend dae muzikaal woort ingevöld door de bènd “Vegas” en daobie auch DJ Erwin. Bie beide kaom genôg van de rèk aaf. Veer höbbe kènne en maoge genéte van ein sjwoane aovend.
Op zondig 5 fibrewarie zin veer vanaaf Auwt Baek door de keuninklikke hèrmenie nao de Mondial gebrach saame mit de jeurgraod en oeteraard ôs jubileumprinse. Versjillende vereiniginge oet ’t Baekse heije zich de meute getrwuès, om de sjtaasjewaeg aaf te gaon, om ôs te komme felicitére mit ôs 12×11 jaorig jubiléum. Daonaeve höbbe ein twintigtal vastelaovesvereiniginge de waeg gevônge nao de Mondial oet gans Limburg èsauch 2 vereiniginge oet Bèlsj-Limburg. Versjillende collega SLV-vereiniginge mit ’t SLV-besjtuur zèlf zin nao Baek aafgereis; vanoet Gennep pès Eijgelshoave höbbe de kleine boavezaal bezoch om ôs de hand te kômme sjödde. Veer höbbe väöle sjwoane cadeaus en ordes in ôntvangs maoge numme van collega-vastelaovesvereiniginge èsauch anger aanwezige.
De Baeker hofkapel haet ein puike prèstasie neergezat door vanaaf 11.00 oer de instrumènte in de hènj te pakke in de groate zaal van de oetgaonsgelaegenheid Mondial en om 20.45 oer te sjtoppe mit de muzikale-marathon. Ze zin waal gehôlpe door DJ Erwin dae af en toe de regie euvernaom. Daonaeve höbbe de muzikante van de Baeker Hofkapel saame mit de prinsekapel van de sjtadsvastelaovesvereiniging d’n Uul oet Remunj oppe bühne gesjtange.
De auwt prinse höbbe de jubiléumrecepsie verzörg ès sjpraeksjtalmeister en begeleiding van de vereiniginge nao de kleine zaal. Alles leep op rölkes. Vanaaf dees plaats wille veer eederein danke, dae zich op wat veur ein maneer dan auch ingezat haet, om ’t jubiléumweekend te laote sjlage.
Veer kènne grwuètsj terôk kieke op ein sjwoane jubiléumweekend!
Groetend mit eine Baeker Allewiel!
Vastelaovesvereinging “de Baeker Pottentaote”